Канон святым апостолам, глас 1.

Тропарь, глас 3:

Апо́столи святи́и, моли́те Ми́лостиваго Бо́га, да прегреше́ний оставле́ние пода́ст душа́м на́шим.

Кано́н святы́м Апо́столом. Творе́ние Феофа́ново. Гла́с 1.

Пе́снь 1

Ирмо́с: Твоя́ победи́тельная десни́ца боголе́пно в кре́пости просла́вися: та́ во, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Припев: Святии апостоли, молите Бога о нас.

Боже́ственными просвети́вшеся заря́ми трисо́лнечнаго сия́ния сла́внии, положе́нием нареко́стеся вои́стинну бо́зи, светови́днии Апо́столи: те́мже по до́лгу ва́с ве́рою почита́ем.

Сло́ва я́вльшагося на земли́ за милосе́рдие дебельство́м пло́ти, уго́днии служи́телие, и его́ все́х повеле́ний исполни́телие ве́рою бы́сте, при́сно почита́етеся Апо́столи.

Слава: Све́тлыми луча́ми Пресвята́го Ду́ха при́сно блаже́ннии, всего́ мя просвети́те, грехо́в тьмо́ю покрыва́емаго, и к покая́ния пути́ Я́ве наста́вите.

И ныне, Богородичен: Я́же апо́столов ра́дость, Богороди́тельнице Всенепоро́чная Влады́чице, я́ко Ма́ти бы́вши в те́х боголе́пно глаго́лавшему, с ни́миже моли́ся, огня́ гее́нны изба́вити мя́.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жься, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

И́же еди́н неви́димый Бо́г, ви́димь бы́сть воплоща́емь, и ученики́ ва́с избра́в во все́м ми́ре, его́ и́мя и превосходя́щую сла́ву пропове́дающих, преблаже́ннии Боже́ственнии апо́столи.

Тебе́ еди́ному согреши́х Христе́, Тебе́ еди́ному беззако́нновах, и ду́шу злы́ми оскверни́х: Твое́ю ми́лостию очи́сти и спаси́ мя, име́яй моля́щыя Тя́, еди́не благопремени́телю Иису́се, прему́дрыя Апо́столы Твоя́.

Слава: Го́рестей стра́стных скве́рн, и го́рести грехо́вныя изба́вите мя́ я́ко ми́лостивии Апо́столи, и покая́нием ослажда́юще мою́ мы́сль, я́ко Боже́ственную нося́ще сла́дость в се́рдцы всехва́льнии.

И ныне, Богородичен: С невеще́ственными служи́тели, Де́во Неискусобра́чная, со все́ми вы́шними си́лами, с му́ченики и Апо́столы, Христа́, Его́же воплоти́ла еси́ от чи́стых крове́й Твои́х: умоли́ спасти́ся рабо́м Твои́м.

Седален, глас 4.

Свети́ла в конце́х, ученики́ Твоя́, Христе́, яви́л еси́, сия́ющия душа́м, су́щим во тме́, ра́зум Тво́й, Влады́ко, и, ле́сть и́дольскую те́х ра́ди омрачи́в, уче́ньми благоче́стия просвети́л еси́ ми́р. Те́х мольба́ми спаси́ ду́ши на́ша.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше свято́му, во спасе́ние на́ше и обновле́ние.

Мо́ре безбо́жия и неве́рства возмути́вше, яжде́нием ва́шим, ко́ни богоизбра́ннии Христо́вы Апо́столи: врага́ потопи́сте мы́сленнаго, и потопле́нныя челове́ки извлеко́сте ко спасе́нию.

Прия́телище ду́ха Боже́ственных сия́ний Апо́столи, омраче́нную мою́ ду́шу, и прия́тну вся́ческих страсте́й бы́вшую, све́том покая́ния просвети́те богоблаже́ннии Боже́ственнии Апо́столи.

Слава: О́блацы, и́же во́ду живо́тную одожди́вшии, изсо́хшую мою́ ду́шу бездо́ждием страсте́й Боже́ственне напо́йте, и доброде́телей возрасти́ти кла́сы сотвори́те спасе́ния, Апо́столи всехва́льнии.

И ныне, Богородичен: Проро́цы, Апо́столи прехва́льнии, му́ченицы, с ма́терию изба́вителевою моли́теся приле́жно, я́ко да изба́вимся от грехо́в, и ве́чныя му́ки, и искуше́ний, и бе́д, и скорбе́й.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Ка́плющыя сла́дость и кра́сное весе́лие, яви́стеся го́ры всесла́внии апо́столи, го́ресть всю́ вра́жию оте́млюще, и ве́рныя наслажда́юще.

Прише́дша стра́нна Христа́ во своя́ разуме́сте, и и́скренно тому́ прилепи́стеся. Те́мже от чужда́го мя́ изба́вите вре́да, Боже́ственнии сло́ва Апо́столи.

Слава: Та́йныя души́ моея́ исцели́ я́звы, моли́твами свяще́нно в ми́ре пропове́давших Боже́ственное Твое́ прише́ствие, и стра́сти Ще́дре, и е́же из гро́ба воскре́сение.

И ныне, Богородичен: Со все́ми безпло́тными, Его́же воплоти́ла еси́ Бо́га сло́во, па́че сло́ва, Богоро́дице Де́во моли́, от безслове́сных дея́ний и плотски́х страсте́й свободи́тися рабо́м Твои́м.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Мре́жами слове́сными улови́сте язы́ки, к ра́зуму явле́ннаго назда́ния челове́ков, о богоблаже́ннии апо́столи: его́же приле́жно о ми́ре моли́те.

Душе́ моя́ смире́нная, душе́ окая́нная, душе́ непока́янная, пока́йся, и возопи́й Христу́: согреши́х, очи́сти мя́ Влады́ко Человеколю́бче, моли́твами Апо́стол Твои́х, я́ко преблаги́й.

Слава: И́же дре́вле изра́илю источи́вый во́ду из ка́мене всеси́льне, разреши́ ми омраче́ние Христе́, и приноси́ти то́ки сле́з сотвори́, моли́твами апо́стол Твои́х, я́ко многоми́лостив, да воспева́ю и велича́ю Твое́ благоутро́бие.

И ныне, Богородичен:Де́во, из Тебе́ за бла́гость роди́тися благоизво́лившаго умоли́, я́ко Творца́ и Бо́га, спасти́ от искуше́нии и напа́стей, на Тя́ Пресвята́я, всегда́ упова́ние иму́щих.

Кондак, глас 2:

Тве́рдыя и Боговеща́нныя пропове́датели, верх учени́к Твои́х, Го́споди, прия́л еси́ в наслажде́ние благи́х Твои́х и поко́й: боле́зни бо о́нех и смерть прия́л еси́ па́че вся́каго всепло́дия, Еди́не све́дый серде́чная.

Икос:

Всечестну́ю и преблаже́нную па́мять ва́шу творя́щии ны́не, в пе́снех приле́жно вопие́м к ва́м: пресве́тлая и богозра́чная свети́ла ми́ра, возлю́бленнии ученицы́ Христо́вы двана́десяте, я́ко иму́ще к Нему́ дерзнове́ние, моли́теся за ны́, ва́м бо дана́ е́сть благода́ть исцеле́ний и грехо́в проще́ния, приле́жно у́бо Его́ моли́те грехо́в и напа́стей изба́витися на́м, да еди́наго Человеколю́бца, ва́с просла́вльшаго, прославля́ем.

Пе́снь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Исто́чник живота́ Иису́с Госпо́дь сы́й, ва́с оста́ви ученики́ я́коже ре́ки, вода́ми напая́ющыя богоразу́мия всю́ подсо́лнечную, и пою́щыя: хва́льный отце́в Бо́г и препросла́влен.

О́гнь мы́сленный в се́рдцы нося́ще, Боже́ственную благода́ть Христо́ву, пожго́сте ученицы́ ве́щь безбо́жия. Те́мже ве́щныя моя́ стра́сти попали́те вопию́щаго: хва́льный отце́в Бо́г, и препросла́влен.

Слава: О́гненнаго муче́ния изба́ви мя́ Бо́же, моли́твами сла́вных Твои́х учени́к, и не отве́ржи мене́ от лица́ Твоего́ Го́споди, в покая́нии взыва́юща: хва́льный отце́в Бо́г, и препросла́влен.

И ныне, Богородичен: Тлетво́рных грехо́в и страсте́й изми́ мя Го́споди, и́же нетле́нно роди́выйся от Де́вы Богома́тере, все́м же нетле́ние да́руя, пе́сненно пою́щым: хва́льный отце́в Бо́г, и препросла́влен.

Пе́снь 8

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Я́ко лучы́ со́лнце вели́кое ва́с простре́ во всю́ вселе́нную, озаря́я ве́рою пою́щих апо́столи: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Я́ко па́стырие су́ще слове́снии, я́ко А́гнцы па́стыря, я́ко о́вцы а А́гнца изба́вителя на́шего Христа́, богови́дцы Апо́столи моли́те непреста́нно, от мы́сленнаго мя́ во́лка изба́вити, и спаса́емых ча́сти сподо́бити мя́.

Слава: Преокая́нная душе́, стени́ и возопи́й Го́сподеви: согреши́х па́че все́х, и беззако́нновах лю́те: очи́сти и спаси́ мя я́ко блудни́цу, я́ко мытаря́, я́коже разбо́йника ще́дре, Апо́столов моли́твами благоприя́тными.

И ныне, Богородичен:Со А́нгелы ма́ти Бо́жия, со Апо́столы, и Му́ченики, и со проро́ки умоли́ Христа́, спасти́ взыва́ющыя: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Пе́снь 9

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Боже́ственнии Свята́го Ду́ха, и светоза́рнии свети́льницы показа́стеся, светозаре́нием честна́го и прему́драго пропове́дания блаже́ннии, просвети́сте всю́ вселе́нную, тьму́ и́дольскую отгна́вше.

Боже́ственнаго мы́сленнаго виногра́да ло́зие бы́вше, Боже́ственное гро́здие возрасти́сте, источа́юще спаси́тельное вино́ сла́внии апо́столи. Те́мже мя́ от пия́нства сласте́й изба́вите.

Слава: Трепе́щу окая́нный помышля́я стра́шное о́но Христе́ мо́й суди́ще Твое́, дея́ньми бо сту́дными и скве́рными ны́не обложе́н е́смь, и пре́жде суда́ осужде́н: те́мже мя́ Апо́стол Твои́х моли́твами уще́дри.

И ныне, Богородичен: Еди́на челове́ки обожи́ла еси́, воплоще́нно сло́во поро́ждши: его́же моли́ со апо́столы и му́ченики пречи́стая, Де́во Всенепоро́чная, о на́с ве́рою ублажа́ющих и чту́щих тя́.

Молитва

Влады́ко Всемогу́щий, Го́споди Бо́же на́ш, избра́вый возлю́бленныя Своя́ ученики́ и апо́столы на про́поведь спасе́ния всему́ ми́ру, да́вый и́м вла́сть отпуща́ти грехи́! Приими́ хода́тайства и́х о ро́де челове́ческом, его́же и суди́ти с ни́ми и́маши, те́х са́мых, я́ко друго́в Твои́х, на́м зело́ честны́х, дерза́ем, недосто́йнии, в предста́тельство к Тебе́, многопоспешеству́ющее ко спасе́нию ду́ш на́ших приводи́ти, моля́ще и́х усе́рдно.

Святи́и первоверхо́внии апо́столи Пе́тре и Па́вле, евангели́сти Христо́вы Иоа́нне Богосло́ве и Матфе́е, первозва́нный учениче́ Андре́е, водруже́нием креста́ Росси́ю благослови́вый, апо́столи святи́и Иа́кове, бра́те Госпо́день, со други́м Иа́ковом, Фили́ппе, Варфоломе́е, Фомо́, Си́моне, Иу́до и Матфи́е! Вси́ святи́и богоизбра́ннии апо́столи, изря́днейшии уго́дницы Христо́вы, безбо́жия искорени́телие и ве́ры и́стинныя насади́тели! Помози́те на́м мо́щным ва́шим пред Го́сподем хода́тайством изба́витися от вся́каго зла́ и вра́жия ле́сти, тве́рдо же пре́данную ва́ми ве́ру Правосла́вную сохраня́ти, в не́йже ва́шим предста́тельством ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде́ поживе́м житие́ и сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, Еди́наго в Тро́ице сла́вимаго и покланя́емаго Бо́га, ны́не, и при́сно, и во ве́ки веко́в. Ами́нь.